call us now

251 1 911 23 08 57 / 60 76 06

Learning is power

ነገ ሩቅ ነውን?

የነገውን ሰው ማነጽ

ይድረስ ለወላጆች !!

     የዛሬዋ መጣጥፌ መልዕክቷን የምትጀምረው ባሳለፍነው ዓመት ሕፃናት ጤናማ የሆነ አካል፣ አእምሯሮ፣ ስሜትና ማህበረ - ስነልቦና ተላብሰው እንዲያድጉ በማስቻል ረገድ አስፈላጊውን ጥረት ላደረጋችሁ የህብረተሰብ አባላት እንኳን ለ2010 ዓ.ም አዲስ ዓመትና አዲሱ የትምህርት ዘመን በሰላም አደረሳችሁ በማለት ነው፡፡

     ትምህርት ለአንድ ሀገር እድገት ወሳኝ መሳሪያ መሆኑ ተደጋግሞ ሲገለፅ የቆዬ ዕውነታ ነው፡፡ ከዚህ መሰረታዊ ሃሳብ በመነሳት ዘመናዊ ትምህርት በሀገራችን ከተጀመረበት ጊዜ ጀምሮ የዕውቀት ገበታን ለማዘመን በርካታ ጥረቶች ተከናውነዋል፡፡ ይሁን እንጂ ዘመናዊ ትምህርትን በጥራት ደረጃ ለማዘምን ብዙ የሚቀሩን የቤት ሥራዎች ቢኖሩም ጥረታችን በበጎ መልኩ እየቀጠሉ መምጣቱ ተስፋ ሰጪ ነው፡፡ ለምሳሌ ትምህርትን ለማስፋፋት የተደረገው ጥረት በመደበኛ ትምህርት ሥርዓተ - ማዕቀፍ ውስጥ የአንደኛና ሁለተኛ ደረጃ ትምህርትንና የኢኮኖሚ ዕድገት ፍላጎት የሚጠይቀውን የሰለጠነ የሰው ኃይል ማፍራት በሚያስችሉ የሦስተኛ ደረጃ ስልጠናዎች ላይ ያተኮረ መሆኑ መልካም ቢሆንም በሌላ በኩል ግን ሕፃናት ገና ከመጀመሪያዎቹ የዕድገት ዓመታት ጀምሮ በአካል፣ በአእምሮ፣ በህይወት ክሂሎትና መልካም ማህበረ-ሥነልቦና ታንፀው እንዲያድጉ የወላጆችና መምህራን ትብብርን የማሳደጉ ጥረት ግን ብዙ ትኩረት ያገኜ አይመስልም፡፡ ስለሆነም በመግባባትና በዕቅድ ላይ የተመሰረተ የወላጆችና የመምህራን ትብብር ለነገው ሰው ሁለንተናዊ ዕድገት ምትክ የሌለው አስተዋፅዖ እንደሚያበረክት የበርካታ ሃገሮች ተሞክሮ ያሳያል፡፡

     በማህበረሰባቸውና ዜጎቻቸው ሁለንተናዊ እድገት ላይ (ፓለቲካዊ፣ ኢኮኖሚያዊና ማህበራዊ መደላድል) መፍጠር የቻሉ ሃገሮች ሕፃናትን ከመነሻው ኮትኩቶ ማሳደግ የነገውን አገር ዛሬ እንደመስራት የሚቆጠር መሆኑን ስላመኑበት የላቀ ትኩረት በመስጠት ብሄራዊ አጀንዳ እድርገውታል፡፡ በዚህ ሂደት ውስጥ የወላጆችና መምህራን ጥምረት ትልቁን ድረሻ እንደያዘ በዘርፉ የተከናወኑ ጥናቶች ያመለክታሉ፡፡ ስለሆነም ወላጆች ለት/ቤቶች ግዙፍ ሀብት ምሆናችንን በመገንዘብ ልጆቻችን ስለሚማሩባቸው ት/ቤች መረዳት፣ በእንቅስቃሴዎች ውስጥ መሳተፍ፣ ስለ ት/ቤቶቹ መርሃ - ግብሮችና ስለሚኖሩን ተሳትፎዎች መጠየቅ ይገባናል፡፡ በዕቅድ ላይ የተመሰረተ የወላጆች ተግባራዊ ተሳትፎና የውይይት መርሃ - ግብር በእጅጉ አስፈላጊ ጉዳዮች ናቸው፡፡ ከተቻለም ሌሎች የቤተሰብ አባልት በውይይቱ ሂደት ቢካፈሉ ጠቀሜታው የተሻለ ይሆናል፡፡ ወላጆች ከልምዳችንና ማህበራዊ መሰረታችን በመነሳት በተወሰኑ ርዕሶች ላይ ተጋባዥ መምህራን በመሆን ልምዳችንንና ተሞክሯችን ለተማሪዎች ብታካፈሉ ተጨማሪ ግብዓት ይሆናል፡፡

     አንድ ሕፃን መደበኛ ትምህረት ከመጀመሩ በፊት የነበረው የቤት ውስጥ ተሞክሮ ለቀጣዩ የትምህርት ስኬት ወይም ውድቀት ወሳኝ ምክንያት መሆኑን የትምህርትሥነ-ልቦና ባለሙያዎች ይስማማሉ፡፡ የሕፃኑ የትምህርት ዝግጁነት ማለትም ት/ቤት ገብቶ ለመማር የሚያስችልውን ፍላጎት፤ ክሂሎት፣ ጥበብና ዘዴ የመላበሱ ሁኔታ ወይም የችሎታ ውስንነት፣ ምኞት፣ ፍረሃት፣ ድንጋጤ፣ ሐዘንና የስሜት ጉዳት…ወ.ዘ.ተ መጠን በቤት ውስጥ ከነበረው ማህበራዊ መሰረቶች ወይም ልምዶች ጋር የተቆራኘ ስለመሆኑ የመስኩ ተመራማሪዎች ሮሆቦት ሄስና ቨርጅንያ ሽፕማን በጥናታቸው አረጋግጠዋል፡፡ በመሆኑም ወላጆች የልጆቻቸውን ሁኔታ በትዕግስት ማስተዋል ይጠበቅባቸዋል፡፡

     የእያንዳንዱ ሕፃን ዕድገት በእያንዳንዱ የዕድገት ሂደት ላይ የተመሠረተ ነው፡፡ ሕፃናት በተለያዩ የዕድገት አቅጣጫዎች በአካል፣ በአእምሮ፣ በማህበራዊ - ሥነልቦናና በስሜት ያድጋሉ፡፡ ይሁን እንጅ አንድ ሕፃን በአንዱ የዕድገት አቅጣጫ ቀድሞ ሲገኝ በሌላው አቅጣጫ አዝጋሚ ሊሆን ይችላል፡፡ ይህ የሚያሳየን ፈጣን የዕድገት ሂደት ማለት በጣም የተሻለ ነው ማለት አለመሆኑን ነው፡፡ ስለሆነም የሕፃናትን ተፈጥሮ ለመረዳት ማሰትዋልን ይጠይቃል፡፡ በሕፃናት አስተዳደግ ላይ ጥናት ያደረጉት ሚስ. አሊኖር ኮሎምበስ አንድ ያልታወቀ ፈላስፋ ስለ ሕፃት አፈጣጠርና የባህርይ ልዩነቶች ያሰፈረውን አስተውሎት በሚከተሉት ሥነ - ቃሎች አቅርበውልናል፡፡

  • አንዳንድ ሕፃናት እንደ ጋሪ ግፊት ይፈልጋሉ፡፡
  • አንዳንድ ሕፃናት እንደ ታንኳ መቀዘፍ ይፈልጋሉ፡፡
  • አንዳንድ ሕፃናት ፈጣን ስለሆኑ ትኩረት ይሻሉ፡፡
  • አንዳንድ ሕፃናት በአንድ ነገር ላይ ለማተኮር ትዕግስት የላቸውም፡፡
  • አንዳንድ ሕፃናት እንደ ተሳቢ መኪና መጎተትና መሳብን ይሻሉ፡፡
  • አንዳንድ ሕፃናት በነፋስ እንደተሞሉና ለመፈንዳት እንደተዘጋጁ ነገሮች ያያያዝ ጥንቃቄ ይሻሉ፡፡
  • አንዳንድ ሕፃናት ዘወትር እምነት የሚጣልባቸው ተባባሪና ተግባቢ ናቸው፡፡

     ምንም እንኳን የእያንዳንዱ ሕፃን ባህርይ የተለየ ቢሆንም ሁሉም ሕፃናት የሚጋሯቸው ተመሳሳይ መሠረታዊ ባሕርያትም አሏቸው፡፡ ለምሳሌ ፍቅር፣ ደህንነት፣ ጥበቃ፣ ዋስትና፣ መረጋጋት፣ መልካም አመጋገብ፣ ሥርዓት፣ አካላዊ እንቅስቃሴ፣ ከለላ፣ ቁጥጥር፣ ተቀባይነት ወይም ተሰሚነት፣ መወደድ…ወ.ዘ.ተ ከሚያመሳስሏቸው ባህርያት ውስጥ ጥቂቶቹ ናቸው፡፡ ማንኛውም ሕፃን በራስ የመተማመን ባሕርይ እያዳበረ ሲመጣና ራሱን ለመቻል አንድ ርምጃ ወደፊት በሚራመድበት ወቅት የምክር አገልግሎት ሊያገኝና የቁጥጥር ሥርዓት ሊበጅለት ይገባል፡፡ ይህንንም ሥራ ወላጆችና መምህራን በመተባበር የምናከናውነው ተግባር መሆኑን መረዳት ይኖርብናል፡፡

     በሕፃናት የዕድገት ሂደት ውስጥ እንደ አካላዊና አእምሯዊ ዕድገቶች ሁሉ የሕፃኑ ማህበራዊና ስሜታዊ እድገቶችም በጣም አስፈላጊዎች ናቸው፡፡ አንድ ሕፃን ነፃና ብቁ ሆኖ  በመማር - ማስተማሩ ሂደት ውስጥ ለመሳተፍ ፍላጎት የሚያሳየው በአካባቢው ተስማሚ ስፍራ ያለው መሆኑ ሲሰማው ነው፡፡ የሕፃኑ የዕድገት አካባቢዎች አንዱ ከሌላው የተያያዙ መሆናቸው በእጅጉ ጠቃሚ ነው፡፡ በለውጥ ሂደት ውስጥ የመረጋጊያ ወቅቶችን ተከትለው የሚመጡ አካላዊ ለውጦች የሚስተዋሉባቸውና አዳዲስ ትምህርቶች የሚቀሰሙባቸው ግዚያት አሉ፡፡ እነዚህ ክስተቶች በሌሎች የማስተካከያ ሂደቶች ውስጥ ያልፋሉ፡፡ እያንዳንዱ የዕድገት ሂደት ሕፃኑን ለቀጣይ የዕድገት ሂደት ያዘጋጀዋል፡፡ በአጠቃላይ ጤናማ የሕፃናት ዕድገት የወላጆችን፤ የመምህራንና የማህበረሰቡን ትብብር የሚሻ አንኳር ጉዳይ መሆኑን እየጠቆሙኩ በቀጣይ መምህራን ሚና ላይ በምታተኩረው መጣጥፌ እስከምንገኛኝ ድረስ ለአዲሱ ዓመት በጎውን ሁሉ እየተመኘሁ እሰናበታለሁ!!

 

መልካም መልካሙን ለሕፃናት!!!

መምህር ሣህሉ ባዬ

(MBA, MA, BA & IDPM)


  • SHARE IT ON

Comments

Adane Tadesse 5 months ago

Sep 14, 2017

በሀገራችን ትኩረት የሚሻ አብይ ጉዳይ የልጆች አስተዳደግ ነው። ለዚህ ደግሞ ወላጆች፣ መምህራን የተሻለ የትምህርት ፖሊሲ በመቅረፅም ረገድ የመንግስትም ድርሻ ጉልህ ቢሆንም እየተጋን አይደለንም። ስለዚህ ሁሉም ከቀልቡ እንዲያስብ ጅምር ኩርኮራ ነውና በርታ ከጎንህ ነን።

Sahilu Baye 5 months ago

Sep 15, 2017

Thank you very much Adane for the kind words! Stay blessed !!

leave a comments

BECOME VOLUNTEER

“If our hopes of building a better and safer world are to become more than wishful thinking, we will need the engagement of volunteers more than ever.”