call us now

251 1 911 23 08 57 / 60 76 06

መልዕክተ - ትምህርት 10

የኢትዮጵያዊ ሕፃናት ህይወት ሲዳሰስ (ክፍል 2)

   በአስቸጋሪ ህይወት ውስጥ የሚኖሩ ኢትዮጵዊ ሕፃናት ቁጥር ከአምስት ሚሊዮን እንደሚበልጥ በጉዳዩ ዙሪያ የተደረጉ ጥናቶችን በማጣቀስ ባለፈው ጽሁፌ መዳሰሴን አስታውሳለሁ፡፡ በዛሬዋ መልዕክቴ ደግሞ በአስቸጋሪ ህይወት ውስጥ የሚኖሩ ኢትዮጵያዊ ሕፃናት የገጠሟቸውን እነደ የምግብ እጥረት፣ ተላላፊ በሸታዎችና መሰል ችግሮች ሰነዶችን በማጣቀስ እንዳስሳለሁ፡

   እንደ ጽሐፊው አረዳድ በአሰከፊ ህይወት ውስጥ የሚኖሩ የኢትዮጵያዊ ሕፃናት ብዛት ከ5 - 6 ሚሊዮን ሕዝብ ብዛት ካላቸው ሃገራት ለምሳሌ ቱርክሜንስታን፣ ሲንጋፖር፣ ዴንማርክ፣ ፊንላንድ፣ ስሎቫኪያ፣ ሪፓብሊክ ኮንጎ፣ ኖርዌ፣ ኤርትራና ፓኪስታን ህዝብ ብዛት ጋር ሲወዳደር የአንድ ሃገር ህዝብ ብዛት እነደማለት ሆኖ አግኝቶታል፡፡ በእነዚህ ሕፃናት ጉዳይ ላይ የተደረጉ ጥናቶችንና ታሪካዊ ሂደቱን መለስ ብለን ስንዳስስ ደግሞ ችግሩ በሃገራችን ትኩረት አግኝቶ በተቋም ደረጃ መጠናት የጀመረው የኢትዮጵያ የልማት ፕሮጄክቶች ባለስልጣን (Development Project Authority) እ.ኤ.አ በ1987 ዓ.ም ከተቋቋመ አንድ ዓመት በኃላ ጀምሮ እንደነበር ከሰነዶች ለማረጋገጥ ተችሏል፡

   እ.ኤ.አ በ2018 ዓ.ም በተዘገበውና በዓለም አቀፉ ስነ-ሕዝብ ሪቪው ድረ-ገፅ ላይ በተነበበው ዘገባ እንደተመለከተው በአሁኑ ወቅት የኢትዮጵያ ህዝብ ብዛት 107,534,882 ሚሊዮን መድረሱ ታውቋል፡፡ የህዝብ ብዛት መናርን ተከትሎም በአስከፊ ህይወት ውስጥ የሚኖሩ ኢትዮጵያዊ ሕፃናት ቁጥር በከፍተኛ ደረጃ ጨምሯል፡፡ ለሕፃናቱ አስከፊ ህይወት ዋና መንስኤዎች ሆነው የተገኙት ድህነት፣ ርሃብ፣ ድርቅና ግጭቶች መሆናቸው ታውቋል፡፡ በሃገራችን የሚገኙና በአስቸጋሪ ህይወት ውስጥ የሚኖሩ ሕፃናት ጤንነት ከሌሎች ሕፃናት ጋር ሲወዳደሩ በጆሮ ህመም በሁለት እጥፍ ፣ በአስም በሽታ በአራት እጥፍ ፣ በተቅማጥና ሆድ ቁርጠት በአምስት እጥፍ ፣ በርሃብ መጠቃት በሁለት እጥፍ፣ ከ1/5ኛ በላይ የሆኑ በስሜት መታወክ፣ የመማር ውስንነትና የባህርይ ችግሮች ያሉባቸውና በክፍል ውስጥ ደጋሚ የሆኑ በሁለት እጥፍ፣ ወላጆቻቸውን በሞት ካጡት ከግማሽ በላይ የሆኑት ደግሞ በጭንቀት፣ በድብረትና በብቸኝነት የስነልቦና ቀውሶች የሚሰቃዩና ዕድሜያቸው 8 ዓመት ሲደርስ ደግሞ ለአዕምሮ ህመም የሚጋለጡ ሆነው ተገኝተዋል፡፡ የትምህርት ተሳትፏቸውም ከ20% በታች ነው፡፡ እንደ አጠቃላይ ሃገራዊ አጀንዳ የኢትዮጵዊ ሕፃናት የትምህርት ተሳትፎ ሲፈተሸና በሃገር ደራጃም ከዓለም አገራት ጋር ሲወዳደር የመጨረሻዎቹ ተርታ እንደምንገኝ ሰነዶች ጠቁመዋል፡፡ ይሁን እንጂ በአሁኑ ወቅት በአስከፊ ህይወት ውስጥ የሚኖሩ ሕፃናት መሰረታዊ ችግሮች ሆነው የተገኙት የምግብ እጥረት፣ ተላላፊ በሽታዎች፣ አመንምን፣ ቅንጨራና የሰውነት ክብደት ማነስ ናቸው፡፡ በእነዚህ ነጥቦች ላይ በቀጣይ በሚኖረኝ መልዕክት አጠር ያለ ዳሰሳ ለማቅረብ እሞክራለሁ፡፡ እስከዚያው ቸር ይግጠመን እያልኩ ለዛሬ እሰናበታለሁ፡

መልካም መልካሙን ለሕፃናትና ለሃገሬ ተመኘሁ!!

ሣህሉ ባዬ ዓለሙ

የፕሮጄክት ማኔጅመንት፣ የሕፃናት ዕድገትና ስነልቦና ባለሙያ

www.enrichmentcenters.org

 

 


  • SHARE IT ON

Comments

leave a comments

BECOME VOLUNTEER

“If our hopes of building a better and safer world are to become more than wishful thinking, we will need the engagement of volunteers more than ever.”